Ka përfunduar sot faza e intervistave në kuadër të procesit përzgjedhës të Drejtorit të Byrosë Kombëtare të Hetimit (BKH). Intervistat u zhvilluan në ambientet e Strukturës së Posaçme kundër Korrupsionit dhe Krimit të Organizuar (SPAK), duke nisur që në orën 09:00, dhe zgjatën rreth 45 minuta për secilin kandidat.
Kjo fazë pasoi testin e poligrafit të zhvilluar më 24 dhe 25 korrik dhe u mbikëqyr nga përfaqësues ndërkombëtarë, me qëllim garantimin e standardeve të transparencës dhe integritetit. Sipas SPAK, kandidatët u vlerësuan për njohuritë profesionale, aftësitë drejtuese dhe qasjen ndaj sfidave të drejtimit të BKH-së.
Pas përfundimit të intervistave, Komisioni i Përzgjedhjes vendosi që të shtatë kandidatët të kalojnë në fazën tjetër: verifikimi i figurës dhe deklarimi i pasurisë, në përputhje me ligjin nr. 95/2016.
Kandidatët që vijojnë garën janë: Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta.
SPAK thekson se procesi i përzgjedhjes do të vijojë të zhvillohet mbi baza të qarta ligjore dhe profesionale, duke garantuar transparencë dhe besueshmëri maksimale.
Njoftimi i SPAK
Përfundon Faza e Intervistës në Procesin e Përzgjedhjes së Drejtorit të BKH-së
Pas zhvillimit të testit të poligrafit më datat 24 dhe 25 korrik, sot përfundoi edhe faza e intervistës për përzgjedhjen e Drejtorit të Byrosë Kombëtare të Hetimit (BKH).
Intervistat nisën në orën 09:00, në ambientet e Strukturës së Posaçme kundër Korrupsionit dhe Krimit të Organizuar (SPAK) dhe zgjatën 45 minuta për secilin kandidat.
Kjo fazë, e monitoruar nga përfaqësuesit ndërkombëtarë, u fokusua në vlerësimin e njohurive profesionale, aftësive drejtuese dhe qasjen e kandidatëve ndaj sfidave që lidhen me pozicionin e Drejtorit të BKH-së.
Në përfundim të kësaj faze, Komisioni i Përzgjedhjes vendosi që të shtatë kandidatët t’i nënshtrohen fazës së verifikimit të figurës dhe deklarimit të pasurisë, në përputhje me nenin 6 të ligjit nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”.
SPAK rikonfirmon angazhimin për të garantuar një proces përzgjedhjeje transparent, të drejtë dhe të bazuar në kritere të qarta profesionale dhe ligjore.
