Ish-ministri i Shëndetësisë, Ilir Beqaj, ka reaguar nga qelia pas një incidenti që ndodhi në orët e para të mëngjesit në komisionin hetimor për çështjen e “Sterilizimit”. Gjatë mbledhjes, Beqaj u pa të hynte në sallë dhe të drejtohej me fjalë dhe gjeste drejt deputetes Ina Zhupa. Zhupa ka pretenduar se ish-ministri e ka kërcënuar, ndërsa kryetarja e komisionit, Albana Vokshi, njoftoi se ngjarja do të referohet tek autoritetet përkatëse.
Në një reagim, Ilir Beqaj sqaroi se kishte hyrë në sallë për shkak të mënyrës se si deputetja Zhupa i drejtohej, duke thënë se nuk pranon të trajtohet si një send, edhe pse është i paraburgosur. Ai theksoi se nuk kishte kërcënuar apo fyer askënd, por kishte shprehur revoltën e tij për atë që e konsideroi një “tallje deri në kufijtë e torturës” për më shumë se 14 orë.
“Kam shprehur haptazi revoltën time për talljen deri në kufijtë e torturës që bëhej për më shumë se 14 orë. Nuk kam kërcënuar apo fyer askënd. Edhe nëse jam i paraburgosur, nuk pranoj të më fyejnë dhe të më marrin nëpër këmbë. Këtë e refuzoj, e kundërshtoj dhe do të vazhdoj ta kundërshtoj,” tha Beqaj.
Ai shtoi se gjatë 8 muajve të hetimeve, të gjithë dëshmitarët kanë provuar se dy koncesionet, objekt i hetimit, janë histori suksesi dhe se nuk do të lejojë që dështimet politike të opozitës të përdoren për nëpërkëmbjen e dinjitetit të tij.
