Pas një mbledhjeje maratonë të zhvilluar dje në Komisionin Hetimor për Shëndetësinë në Kuvend, Partia Demokratike ka denoncuar një ngjarje të rëndë të ndodhur në ambientet e Parlamentit. Sipas kryetares së Komisionit Hetimor, Albana Vokshi, ish-ministri Ilir Beqja është shfaqur lirisht në Kuvend, edhe pse leja e tij nga burgu kishte përfunduar.
Sipas PD-së, Beqja ka zhvilluar takime private me deputetët e Partisë Socialiste dhe më pas ka hyrë në sallën e mbledhjes së Komisionit, ku akuzohet se ka kërcënuar brutalisht deputetët e opozitës. Ndërkohë, Policia dhe Garda e Republikës nuk kanë ndërhyrë për të parandaluar incidentin.
Pas ngjarjes, Policia e Burgjeve refuzoi ta largonte Ilir Beqjan nga ambientet e Kuvendit, pavarësisht urdhrit të dhënë nga kryetarja e Komisionit. PD pretendon se situata është përkeqësuar më tej, duke akuzuar autoritetet se po i japin Beqjas leje dhe garanci për të shëtitur i lirë në çdo ambient të Parlamentit dhe për të kërcënuar opozitën.
“Opozita nuk do të bëjë asnjë hap pas! Do të bëjmë transparencë dhe do të denoncojmë çdo abuzim. As Rama dhe askush tjetër nuk do të gëzojë asnjë qindarkë të vjedhur nga paratë e shëndetësisë,” deklaroi PD, duke akuzuar qeverinë për përpjekje për të penguar dëshminë e kryeministrit Edi Rama dhe të Vilma Nushit para Komisionit Hetimor.
