Një "qasje pozitive ndaj jetës" mund të favorizojë shëndetin afatgjatë; përkundrazi, depresioni lidhet me rrezikun e shtuar të zhvillimit të sëmundjeve të tjera fizike me kalimin e kohës. Sipas një studimi të publikuar në revistën PLOS Medicine, të rriturit me histori depresioni sëmuren nga patologji fizike rreth 30% më shpejt se ata që nuk vuajnë prej tij.
Studimi u krye nga Kelly Fleetwood nga Universiteti i Edinburgut. Depresioni është çrregullimi më i zakonshëm i shëndetit mendor dhe shoqërohet me një sërë pasojash negative, si sëmundjet e zemrës dhe diabeti. Hulumtimet e mëparshme kanë krahasuar njerëzit me dhe pa depresion për të parë se sa sëmundje fizike zhvillojnë me kalimin e kohës, por shumica e studimeve janë përqendruar në një numër të kufizuar patologjish.
Ky studim i ri përfshiu 172.556 pjesëmarrës nga UK Biobank, të cilët kishin kryer një vlerësim fillestar midis viteve 2006 dhe 2010. Ekspertët përzgjodhën 69 sëmundje fizike dhe ndoqën pjesëmarrësit për një mesatare prej 6.9 vitesh.
Fillimisht, subjektet me depresion kishin mesatarisht tre probleme shëndetësore, krahasuar me një mesatare prej dy sëmundjesh te ata pa depresion. Gjatë periudhës së studimit, të rriturit me histori depresioni akumulonin mesatarisht 0.2 probleme fizike shtesë në vit, ndërsa ata pa depresion akumulonin 0.16.
Sëmundjet e reja më të zakonshme ishin: osteoartriti (15.7% e subjekteve me depresion në fillim të studimit kundrejt 12.5% të atyre pa depresion), hipertensioni (12.9% kundrejt 12%) dhe sëmundja e refluksit gastroezofageal (13.8% kundrejt 9.6%).
Rezultatet theksojnë se një diagnozë e mëparshme e depresionit është një tregues rreziku afatgjatë për zhvillimin e problemeve fizike të shëndetit gjatë moshës së mesme dhe pleqërisë.
"Personat që kanë vuajtur nga depresioni kanë më shumë gjasa të zhvillojnë probleme afatgjata shëndetësore, si sëmundjet e zemrës dhe diabeti. Është e nevojshme që shërbimet shëndetësore të adoptojnë një qasje të integruar për kujdesin ndaj njerëzve me depresion," përfundon Fleetwood.
