Një prej njerëzve më besnikë të bosit të njohur të krimit Aldo Bare ka hyrë ilegalisht në Mbretërinë e Bashkuar, duke përdorur një pasaportë të falsifikuar për të aplikuar për azil. Tabloidi britanik The Sunka ndjekur prej vitit 2023 këtë rast dhe tashmë ka fituar një betejë ligjore 23-mujore për të zbuluar identitetin e tij.
Bëhet fjalë për Maksim Çelën, ish-anëtar i Bandës së Lushnjës, i dënuar me 25 vite burg në Shqipëri për një sërë krimesh, përfshirë vrasjen e oficerit të policisë Klenti Bano në prill të vitit 2000. Pasi kreu dënimin, ai u largua nga Shqipëria dhe hyri në Britani përmes Spanjës, duke përdorur dokumente false.
The Sun raportoi se Çela mbërriti në Mbretërinë e Bashkuar në prill 2023 dhe aplikoi për azil. Gjatë seancave në gjykatën e emigracionit, avokatët e tij kërkuan anonimatin, duke argumentuar se ai rrezikonte hakmarrje nëse zbulohej identiteti dhe vendndodhja e tij. Gjykata pranoi kërkesën dhe ai u mbajt në një qendër ndalimi për emigrantët që kishin hyrë ilegalisht.
Por The Sun nisi një betejë ligjore për të hequr anonimatin e tij, duke argumentuar se ishte në interes të publikut që të mësohej identiteti dhe e shkuara kriminale e Çelës. Pas 23 muajsh proces gjyqësor, tabloidi më i madh britanik e fitoi çështjen, duke e ekspozuar për herë të parë identitetin e tij dhe të kaluarën e tij kriminale.
Në artikullin e publikuar online, The Sun e vendosi këtë histori në faqen e parë me titullin:
“Mostrës i çirret maska – vrasësi dhe terroristi shqiptar i lirë rrugëve të Mbretërisë së Bashkuar, beteja e The Sun për të hequr anonimatin”.
