Pas përplasjes së ashpër mes kryeministres italiane Giorgia Meloni dhe magjistratëve për një vendim të fundit mbi emigrantët, qeveria italiane po planifikon të sjellë një grup tjetër emigrantësh në Shqipëri. Sipas raportimeve nga media italiane “La Repubblica”, pavarësisht vendimit të gjykatës, qeveria italiane nuk është tërhequr nga politika e saj dhe pritet që javën e ardhshme të mbërrijë një tjetër grup emigrantësh në kampin e Gjadrit.
Sipas burimeve të “La Repubblica”, anija italiane që transporton emigrantët mund të mbërrijë në Portin e Shëngjinit të mërkurën ose të enjten, në varësi të kushteve atmosferike. Ky veprim vjen si pjesë e marrëveshjes për menaxhimin e krizës së emigrantëve, por ka shkaktuar debat të madh në Itali, sidomos pas vendimeve gjyqësore të fundit.
Ndërkohë, pas vendimit të Gjykatës së Romës, të bazuar në një vendim të Gjykatës Evropiane të Drejtësisë më 4 tetor, 12 emigrantë të ardhur më parë në Shqipëri janë rikthyer në Itali. Këta emigrantë, kryesisht nga Egjipti dhe Bangladeshi, u konsideruan se vinin nga vende të pasigurta dhe, si rezultat, Gjykata vendosi që ata duhet të qëndrojnë në Itali.
Sot në mëngjes, anija e rojës bregdetare italiane mbërriti në Portin e Shëngjinit për të transportuar 12 emigrantët drejt Italisë. Procesi i transferimit u bë nën masa të rrepta sigurie dhe në bashkëpunim me autoritetet shqiptare.
