Banorët e Krujës dhe Fushë Krujës kanë zhvilluar protestën e dymbëdhjetë ditën e sotme në autostradën Thumanë-Kashar. Ata bllokuan për disa minuta rrugën ndërsa bënë thirrje që kërkesa e tyre për akses në këtë rrugë të merret parasysh.
Ata gjithashtu njoftuan se një përfaqësi e tyre do të takojë kryetarin e Bashkisë Krujë, Artur Bushi ditën e hënë. Protestuesit shpresojnë që nga ky takim të vijë një zgjidhje, që autostrada të ketë hyrje-dalje, pasi në të kundërt nga e mërkura do të përshkallëzojnë protestat.
Ata më herët kanë fajësuar zëvendëskryeministren dhe ministren e Infrastrukturës, Belinda Balluku që e la koncensionarin të izolonte këto zona me rrugën që ndërtoi. Për këtë ata kanë dorëzuar edhe një kallëzim penal në SPAK ndaj Ballukut, ARRSH-së dhe institucionet e tjera përgjegjëse për ndërtimin e kësaj autostrade.
Rruga Thumanë – Kashar është ndërtuar tërësisht me fondet e kompanisë private Gener 2. Edhe pse i kanë dalë disa herë në krah protestës se banorëve, asnjë nga drejtuesit apo deputetët e PD nuk e përmend emrin e kësaj kompanie me pronar Bashkim Ulaj.
Pagesa për këtë rrugë është 270 lek të reja. Edhe pse pretendohet se është totalisht investim privat, kompania Gener 2 e Bashkim Ulajt, kompensohet nga shteti shqiptar nëse në rrugën Thumanë – Kashar nuk kalojnë 28 mijë mjete në ditë. Kompensimi kap shifrën e 8 milionë eurove.
