Një urë e varur që shtrihet 150 metra mbi Grykën e Lumit Dadong në Chongqing të Kinës është cilësuar si ura e varur më e frikshme në botë, për shkak të pamjes së pasigurt dhe tensionit që krijon mbi ata që kalojnë. Gjatë dy viteve të fundit, klipet me automjete të rënda ndërtimi që kalojnë këtë urë të ngushtë dhe të lartë rreth 300 metra mbi lumë janë bërë virale në mediat sociale, duke ngjallur shqetësime për sigurinë e saj. Ura, e cila shtrihet në 240 metra, nuk ka kulla ose bazë mbështetëse, por mbështetet vetëm në katër kabllo çeliku, të cilat mbajnë automjete deri në 45 ton. Ajo është 12 metra e gjerë, e mjaftueshme për të kaluar vetëm një automjet në të njëjtën kohë, dhe përkundër rrjetave të sigurisë në të dyja anët, një gabim në lëvizje mund të shkaktojë pasoja serioze. Lëvizja mbi të është veçanërisht e vështirë kur ka erë të fortë. Për fat të mirë, ura e varur në Grykën e Lumit Dadong në Distriktin Wulong është një projekt i përkohshëm, i dizajnuar për të lehtësuar ndërtimin e një pjese më madhështore të infrastrukturës, Ura Shuangbao. Kur të përfundojë, kjo urë do të jetë ura më e madhe me dy harqe në botë, duke shtrirë mbi lumenjtë Dadonghe dhe Xiaohegou.
Kjo strukturë përkohëse shërben si rrugë për kamionët dhe makineritë e ndërtimit, duke mundësuar arritjen në malin ku do të përfundojë ndërtimi i harkut qendror. Megjithëse ura nuk ka kulla ose kabllo shtesë për mbështetje, katër kabllot e saj masive të çelikut sigurojnë stabilitet të mjaftueshëm për operacionet e ndërtimit deri tani.
