Deputetja e Partisë së Lirisë, Monika Kryemadhi, ka mbajtur një konferencë për shtyp, ku ka shprehur akuzat e saj ndaj qeverisë dhe Edi Ramës, pas arrestimit të ish-bashkëshortit të saj, Ilir Meta. Ajo e quajti arrestimin një “rrëmbim kriminal” dhe theksoi se gjatë operacionit, Meta është goditur në kokë nga një nga efektivët e policisë, të cilin e përmendi si një “motherfucker”.
Kryemadhi theksoi se do ta respektojë masën e “detyrimit paraqitjeje”, por e konsideroi këtë veprim si një pjesë të drejtësisë së “kastruar” nga Rama. Ajo kritikoi gjithashtu SPAK-un për mungesën e veprimeve të duhura lidhur me çështjet e korrupsionit, duke përmendur ndërtimet pa leje dhe pastrimin e parave.
“Beteja nuk është te forca, por te argumenti. A ka qeveria argument për inceneratorin e Tiranës? Po ndërtimi pa leje i hektarëve me kamionë? Çfarë bën SPAK-u?” pyeti Kryemadhi.
Deputetja theksoi se nuk ka pasur asnjë komunikim me Ilir Metën për shtatë muaj, përveç kur ka marrë padinë për divorc. Ajo e lidh masën e arrestit të Metës me përkeqësimin e konfliktit të tyre familjar.
Në fund, Kryemadhi e quajti akuzën e SPAK-ut si një goditje politike dhe shprehu shqetësimin për atë që e quajti “pafytyrësi” lidhur me hetimet e SPAK-ut për shpenzimet e operacioneve mjekësore të familjes Rama. “Më vjen keq që kjo gjë kalon cakun e komunikimit normal,” përfundoi ajo.
