Almir Gjidiaj është arrestuar në Kolumbi, pasi është në kërkim nga SPAK për trafik armësh në kuadër të organizatës kriminale.
Policia e Shtetit, në bashkëpunim me autoritetet kolumbiane, ka finalizuar operacionin “Kartagjena” duke kapur një 33-vjeçar nga Tropoja, të shpallur në kërkim ndërkombëtar. I akuzuari, pjesë e një organizate kriminale, dyshohet për trafikim armësh dhe drejtimin e logjistikës për shitjen e tyre në tregun e zi. Operacioni u realizua pas shkëmbimit të informacioneve mes Policisë së Shtetit dhe Interpol Tiranës. Po vijojnë procedurat për ekstradimin e tij në Shqipëri.
Njoftimi
Policia e Shtetit
Finalizohet një tjetër operacion i përbashkët me partnerët, për kapjen e shtetasve në kërkim ndërkombëtar.
Operacioni i koduar “Kartagjena”, rezultat i shkëmbimit të informacioneve ndërmjet strukturave të Policisë së Shtetit dhe atyre të Kolumbisë, për vendndodhjen e një të kërkuari nga drejtësia shqiptare.
Kapet nga Policia kolumbiane, në qytetin e Kartagjenës, 33-vjeçari nga Tropoja, i shpallur në kërkim ndërkombëtar, i akuzuar nga GJKKO, si pjesëtar i një organizatë kriminale për trafikim të armëve.
Në vijim të bashkëpunimit me homologët, për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e shkëmbyera mes strukturave të Policisë së Shtetit dhe atyre të Kolumbisë, nëpërmjet Interpol Tiranës, në kuadër të operacionit policor “Kartagjena”, është lokalizuar, kapur dhe ndaluar në qytetin e Kartagjenës, nga Policia kolumbiane, shtetasi A. Gj., 33 vjeç, lindur në Tropojë.
Ky shtetas ishte shpallur në kërkim ndërkombëtar, pasi Gjykata e Posaçme Kundër Korrupsionit dhe Krimit të Organizuar, e akuzon si pjesëtar të një organizate kriminale për trafikimin e armëve. Roli i tij kryesor ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi.
Interpol Tirana, në bashkëpunim me autoritetet kolumbiane, do të kryejë procedurat për ekstradimin e shtetasit A. Gj., në Shqipëri.
