Turi çiklistik ka shkaktuar kaos në autostradën Tiranë–Elbasan pasditen e kësaj të marte, duke paralizuar qarkullimin dhe krijuar kolona kilometrike automjetesh në të gjithë aksin. Qindra drejtues mjetesh kanë mbetur të bllokuar në trafik për më shumë se dy orë, ndërsa lëvizja në disa segmente është bërë pothuajse e pamundur.
Problemet në qarkullim nisën pak pas mesditës dhe u rënduan ndjeshëm pas orës 15:00, kur fluksi i automjeteve u përball edhe me kufizimet e lëvizjes të lidhura me zhvillimin e turit çiklistik. Situata është përkeqësuar edhe nga moti i keq dhe reshjet e shiut.
Sipas raportimeve nga terreni, kolona me tre rreshta mjetesh shtrihet nga dalja e tunelit të autostradës deri pranë rrethrrotullimit të Bradasheshit. Vështirësi janë raportuar edhe në aksin Tiranë–Durrës, ku rreth orës 13:00 një prej korsive u bllokua për rreth një orë nga policia.
