Një operacion kontrolli është zhvilluar në burgun e Peqint, si pjesë e masave të shtuara për parandalimin dhe goditjen e sendeve të ndaluara brenda burgjeve.
Kontrolli i befasishëm është kryer nga strukturat e Policisë së institucionit, pas informacioneve që ngrinin dyshime për mbajtje të paligjshme të sendeve në godinën B, sektori nr. 2, dhoma 11, në katin e parë të burgut.
Gjatë verifikimeve, është konstatuar se i dënuari Indrit Shaqja posedonte në mënyrë të kundërligjshme një telefon celular në gjendje pune, i cili u gjet i ndezur dhe në karikim në momentin e kontrollit.
Po ashtu, në ambientet e kontrolluara është gjetur edhe një pajisje USB, të cilat janë sekuestruar si prova materiale.
Pas zbulimit të rastit, administrata e institucionit ka njoftuar menjëherë strukturat e SHKBB-së, të cilat kanë nisur procedurat për zbardhjen e plotë të rrethanave dhe mënyrës së futjes së sendeve të ndaluara në ambientet e burgut.
