Eldi Dizdari alias Denis Matoshi konsiderohet sot si një nga krerët e kokainës në Shqipëri.
Gjykata e Posaçme e Apelit la sot në fuqi vendimin për konfiskimin e pasurive të Eldi Dizdari, i cili aktualisht qëndron në Dubai të Emirateve të Bashkuara Arabe. Fillimisht, ai u ndalua pas një urdhër-arresti ndërkombëtar të lëshuar nga autoritetet italiane në kuadër të goditjes së grupit “Los Blancos”, të cilët trafikonin kokainë nga Ekuadori në drejtim të Italisë dhe vendeve të tjera të BE-së, por më pas u lirua.Ai njihet si mik i afërt i Arbër Çekajt, pronarin e kompanisë së bananeve të arrestuar në Gjermani për trafikun e 613 kg kokainë.
Dizdari, ishte pjesë e vrasjes së bujshme në Bllok, të 4 tetorit të 2018. Ai kishte një konflikt me Ervin Matën, ku dyshohet se shkaku ishte një borxh i pashlyer nga shtetasi Mata.
Eldi Dizdari akuzohet për bashkëpunim kriminal dhe drejtim të bandës së trafikut të drogës në nivel ndërkombëtar
Eldi Dizdari ka lindur në Tropojë me një fëmijëri të vështirë. Në vitin 1998, babai i Dizdarit, Naimi është ekzekutuar nga fisi i Haklajve bashkë me dajën e e Eldit. Më pas u ekzekutua dhe xhaxhai i tij, Qazim Dizdari.
Përpos lajmeve të kronikës Eldi Dizdari është përmendur dhe në lajmet rozë pasi është bashkëshorti i ish-misit Suada Sherifi,
Ajo ka preferuar që ta mbajë të fshehtë nga media lidhjen dhe martesën. Pas martesës me Dizdarin, Suada u shkëput nga bota e televizionit duke iu përkushtuar totalisht partnerit të saj me të cilin ka një vajzë.
Jetën ne resorte luksoze, udhëtime, veshje dhe makina deri ne vitin 2018 ish misi nuk nguronte ta reklamonte në rrjetet sociale derisa emri i bashkëshortit të saj po lakohej dhe mediatikisht si një prej narkotrafikantëve më të mëdhenj shqiptar dhe ajo u "zhduk" nga çdo rrjet social. Suada jeton me Eldi Dizdarin prej vitesh në Dubai.
"Çdo gjë filloi natyrshëm, sepse kur është dëshira e mirë, gjërat janë shumë të thjeshta, shumë të lehta dhe shumë të bukura”, është shprehur vite me parë Sherifi, e cila tregoi se kishte gjetur djalin ideal për të lidhur jetën.
Se sa të thjeshtë dhe të lehtë do e ketë jetën tashmë ish misi mbetet për tu parë.
