Irani ka kërkuar tërheqjen e Izraelit nga Libani si pjesë e një marrëveshjeje më të gjerë që, sipas Teheranit, lidhet me negociatat me Shtetet e Bashkuara.
Ministri i Jashtëm iranian, Abbas Araghchi, deklaroi gjatë një takimi me ambasadorë dhe përfaqësues të misioneve diplomatike në Teheran se konflikti në Liban është i lidhur ngushtë me tensionet mes SHBA-së dhe Iranit. Sipas tij, çdo marrëveshje për përfundimin e luftimeve duhet të përfshijë edhe situatën në Liban.
Araghchi u shpreh se Teherani e konsideron zgjidhjen e luftës në Liban si pjesë të kushteve për një marrëveshje më të gjerë rajonale. Ai theksoi se, në konceptin e Iranit, marrëveshja përfshin SHBA-në dhe Izraelin nga njëra anë, dhe Iranin e Hezbollahun nga ana tjetër, duke shtuar se pa tërheqjen e forcave izraelite nga territoret e pushtuara gjatë konfliktit, përfundimi i luftës nuk mund të konsiderohet i plotë.
Ndërkohë, zyrtarë amerikanë kanë deklaruar se tërheqja e Izraelit nga Libani nuk është pjesë e asnjë marrëveshjeje. Nga ana tjetër, autoritetet izraelite, përfshirë kryeministrin Benjamin Netanyahu, kanë bërë të qartë se ushtria nuk do të largohet nga Libani jugor.
