Policia e Durrësit ka dhënë detaje për ngjarjen e rëndë të ndodhur më 25 dhjetor, ku një përplasje mes disa personave ka përfunduar me të shtënat në ajër dhe arrestimin e dy personave.
Sipas raportimeve zyrtare, një 26-vjeçar është vënë në pranga pasi ka goditur me sende të forta një 29-vjeçar, i cili më pas ka reaguar duke marrë një armë zjarri që mbante pa leje dhe duke qëlluar në ajër në gjendje të dehur. Ky veprim kishte për qëllim kanosjen e dy personave të përfshirë në përplasjen paraprake.
Policia ka bërë të ditur se arma e përdorur nga 29-vjeçari është sekuestruar në cilësinë e provës materiale. Për momentin, hetimet po vijojnë për të zbardhur plotësisht rrethanat e incidentit dhe për të përcaktuar përgjegjësitë ligjore të personave të përfshirë.
Njoftimi
Durrës/Vijojnë hetimet për të zbardhur rrethanat e konfliktit për motive të dobëta, të ndodhur pasditen e djeshme, në lagjen nr. 15.
Vihet në pranga 29-vjeçari që gjatë konfliktit, qëlloi me armë gjahu në ajër, me qëllim kanosjen. Ai u kap dhe u shoqërua nga Policia, menjëherë pas rastit.
Sekuestrohet arma e gjahut, e cila posedohej pa leje.
Vihet në pranga një 26-vjeçar dhe shpallet në kërkim kushëriri i tij, sepse gjatë konfliktit, goditën me sende të forta 29-vjeçarin.
Si rezultat i veprimeve hetimore dhe procedurale, të kryera menjëherë pas konfliktit, u arrestuan në flagrancë shtetasit K. D., 29 vjeç dhe P. P., 26 vjeç, të dy banues në Durrës. Gjithashtu, u shpall në kërkim kushëriri i shtetasit P. P., shtetasi D. P., 35 vjeç, banues në Durrës.
