23074 qytetarë me të drejtë vote do të votojnë të dielën e 4 gushtit, për të zgjedhur kreun e ri të bashkisë. Banorët e Himarës do të zgjedhin mes dy kandidatëve, Vangjel Tavo i socialistëve dhe Petro Gjikuria i opozitës.
Gjithsej janë 36 qendra votimi në Himarë që do të hapen në orën 07:00 dhe do mbyllen në 19:00, ndërsa do të aplikohet vetëm identifikimi elektronik dhe qendrat e votimit do të jenë të monitoruara me kamera.
Saga që nisi me arrestimin e Fredi Belerit dhe më pas edhe të kryetarit në detyrë, Jorgo Goro, pritet që të zgjidhet nesër pas një beteje 15 mujore për të parin e himariotëve.
Kujtojmë se pasi u arrestuan të dy kandidatët e mëparshëm, bashkia u drejtua nga nënkryetarja Blerina Bala, e cila më pas u dorëhoq dhe aktualisht bashkia drejtohet nga Arqile Bollano. Edhe ky i fundit rezultoi se ishte përfitues i tokës që ish kryebashkiaku Jorgo Goro ia kishte dhënë në shkelje të ligjit.
