Herbert Kickl është lideri i Partisë së Lirisë të Austri (FPÖ) dhe një emër i njohur në skenën politike austriake vitet e fundit. I lindur më 1968 në kryeqytetin e landit të Karintisë, Villach, ai u rrit në një familje punëtore, ambjent që ndikoi fuqishëm në formimin e bindjeve politike të tij. Pas një periudhe si vullnetar në shërbimin ushtarak alpin, Kickl nisi studimet në gazetari dhe shkenca politike në Universitetin e Vjenës, më pas u rregjistrua edhe për filozofi dhe histori, megjithatë, nuk i përfundoi ato.
Kickl e filloi karrierën politike në Akademinë Politike të FPÖ-së dhe u bë shkruesi i fjalimeve të liderit të atëhershëm të partisë, Jörg Haider, duke u bërë i njohur për stilin e tij provokues. Si sekretar i përgjithshëm i FPÖ-së nga viti 2005 deri në 2018, ai luajti një rol kyç në formulimin e strategjive të partisë. Ndërkohë, si ministër i Brendshëm, ai mbështeti forcimin e policisë, por u shkarkua pas “Skandalit Ibiza“ ku FPÖ-ja u përfshi në akuza të rënda korrupsioni.
Pas rikthimit në parlament, Kickl u bë lider i partisë më 2021, duke sfiduar drejtpërdrejt politikat tradicionale dhe duke u pozicionuar si një kundërshtar i hapur i sistemit. Ai mori një qëndrim të fortë kundër masave të qeverisë gjatë pandemisë COVID-19, duke rekomanduar metoda alternative dhe refuzoi të mbante maskë.
Me përgatitjet për zgjedhjet e vitit 2024, ai surprizoi me slogane më të buta, si “5 vite të mbara”, “Zemra jote thotë PO”, “U bëftë siç doni ju”, duke sinjalizuar një ndryshim në strategjinë e tij politkke. Ndërsa Kickl mbetet një figurë polarizuese, ambicia e tij për të formuar një qeveri të re është e qartë, duke shpresuar të shndërrojë FPÖ në një forcë dominuese në politikën austriake.
Herbert Kickl jeton në Purkersdorf, afër Vjenës, me gruan dhe djalin e tij. Përveç angazhimeve të tij politike, ai është i apasionuar pas natyrës dhe aktiviteteve të sporteve ekstreme. duke e theksuar kështu përkushtimin e tij ndaj një jete aktive dhe aventuroze.
