Udhëheqësi suprem i Iranit ka deklaruar se vdekja e liderit të Hezbollahut, Hassan Nasrallah, "nuk do të mbetet pa hakmarrje", një ditë pasi ai u vra në një sulm ajror izraelit në Liban. Ayatollah Ali Khamenei shpalli pesë ditë zie në Iran në përgjigje të asaj që e quajti "martirizimi i madh i Nasrallah-ut", duke e përshkruar atë si "një rrugë dhe një shkollë mendimi" që do të vazhdojë.
Mediet iraniane raportuan gjithashtu se një gjeneral i Gardës Revolucionare Iraniane u vra në sulmet izraelite në Bejrut të premten. Ushtria izraelite deklaroi se Nasrallah kishte "gjakun e mijëra njerëzve... në duart e tij" dhe se ai u shënjestrua ndërsa "komandonte sulme të reja të afërta".
Ekziston frika se ky sulm mund të përshkallëzojë konfliktin në rajon, pas një viti të tërë luftimesh në kufi midis Izraelit dhe Hezbollahut, të shkaktuara nga sulmet e 7 tetorit dhe lufta në Rripin e Gazës. Faktor kyç për atë që do të ndodhë më pas në Lindjen e Mesme është vendimi i Ayatollah Khamenei. Deri më tani, ai dhe figura të tjera të larta iraniane kanë shmangur betimet për hakmarrje për një seri goditjesh të rënda dhe poshtëruese që Izraeli i ka shkaktuar Hezbollahut në javët e fundit, me sa duket sepse Irani nuk dëshiron një luftë me armikun e tij të përbetuar.
Irani gjithashtu nuk ka bërë thuajse asgjë lidhur me kërcënimin për tu hakmarrë për vrasjen e liderit të Hamasit, Ismail Haniyeh, në Teheran në korrik, për të cilën Irani dhe Hamasi fajësuan Izraelin. Si Hezbollah ashtu edhe Hamasi janë të përcaktuar si organizata terroriste nga Izraeli, SHBA, Britania dhe vende të tjera.
Më herët të shtunën, Ayatollah Khamenei u bëri thirrje myslimanëve që të qëndrojnë pranë Hezbollahut "me burimet dhe ndihmën e tyre", por nuk premtoi hakmarrje për sulmin që vrau Nasrallah-in. "Fati i këtij rajoni do të përcaktohet nga forcat e rezistencës, me Hezbollahun në krye", tha ai.
Ndërkohë, agjencia e lajmeve Reuters citoi dy zyrtarë rajonalë të cilët thanë se udhëheqësi suprem ishte transferuar në një vend të sigurt brenda Iranit me masa të shtuara sigurie. Ata gjithashtu thanë se Irani ishte në kontakt të vazhdueshëm me Hezbollahun dhe aleatët e tjerë për të përcaktuar hapat e ardhshëm, sipas raportit.
