Gjykata Kushtetuese rrëzon pretendimet për paanshmërinë e gjyqtarëve të GjKKO-së dhe legjitimon përdorimin e përgjimeve “Sky-ECC” si prova

Në kërkesën që avokatët e Sali Berishës i kishin drejtuar Gjykatës Kushtetuese, përfshihej edhe pretendimi se gjyqtarët e GjKKO nuk janë të paanshëm, pasi, sipas ligjit të SPAK nr. 95/2016, konkretisht neneve 48-51, llogaritë e tyre bankare dhe telekomunikimet monitorohen periodikisht nga hetuesit e BKH-së, nën mbikëqyrjen e një prokurori të SPAK. Avokatët e zotit Berisha pretendonin se kjo ishte diçka që ndikon në vendimin e gjykatës. Në fakt, ky parashikim është i përcaktuar në Kushtetutë (me ndryshimet e vitit 2016) dhe ligji i SPAK vetëm sa e ka detajuar atë. Sali Berisha ka pretenduar se ky rregull është antikushtetues, duke kërkuar që të shfuqizohet. Interesant është fakti se i njëjti pretendim është ngritur edhe në një çështje “të nxehtë”, të cilën Gjykata Kushtetuese pritet ta shqyrtojë së shpejti. Në çështjen “Sky-ECC”, ngrihet, ndër të tjera, pikërisht çështja e “paanshmërisë” së gjyqtarëve të GjKKO-së, për shkak se llogaritë bankare dhe telekomunikimet e tyre, si dhe të familjarëve të tyre, monitorohen nga punonjës të SPAK. Këtë pretendim, Gjykata Kushtetuese e ka shqyrtuar më parë dhe ka konkluduar se ai është i pabazuar dhe duhet rrëzuar. Ligji që autorizon monitorimin e gjyqtarëve është në përputhje me Kushtetutën, duke arsyetuar si më poshtë: 1. Së pari, ky rregull ligjor është i parashikuar fillimisht në vetë Kushtetutën. 2. Së dyti, monitorimi i llogarive bankare dhe telekomunikimeve kontrollohet, në instancë të fundit, nga vetë gjykata dhe nga KLGJ (në rastet kur mbi bazën e tyre fillon ndonjë procedim disiplinor për gjyqtarët). 3. Së treti, gjyqtarët kanë garanci të plota për të qenë të pavarur, duke përfshirë sigurinë e tyre në emërim, karrierë, pagë dhe mbrojtje. Në këtë mënyrë, ky përfundim i Gjykatës Kushtetuese i jep automatikisht përgjigje të njëjtit pretendim që është ngritur nga biznesmeni Pëllumb Gjoka në çështjen “Sky-ECC”. Rregulli i përcaktuar është se një vendim i mëparshëm i Gjykatës Kushtetuese për një pretendim të ngjashëm shërben si precedent ose si “gjë e gjykuar” nëse i njëjti pretendim ngrihet në një çështje tjetër më vonë.

Përfundimisht, gjykimi për masën e ndalimit të kryetarit të PD i ka dhënë zgjidhje edhe çështjeve të përgjimit të “Sky-ECC”. Pavarësisht çdo pretendimi, ato do të konsiderohen prova të mirëfillta nga prokurorët e posaçëm.