Rezultati i mbrëmshëm shënoi humbjen e dytë radhazi për kombëtaren shqiptare në Ligën e Kombeve, duke shkaktuar valë kritikash nga tifozët dhe analistët sportivë. Megjithatë, duket se Federata Shqiptare e Futbollit dhe kreu i saj, Armand Duka, janë të prirur të pranojnë vetëm lavdërime, ndërsa kritikave për rezultatet negative nuk u kushtojnë vëmendje.
Kjo gjë vërehet qartë në rrjetet sociale të FSHF-së, ku pas ndeshjes me Çekinë, federata bllokoi komentet në postimet e saj, duke kufizuar mundësinë e tifozëve për të shprehur mendimet. Një veprim i tillë është i pakuptimtë, pasi FSHF-ja është një institucion që përfaqëson të gjithë shqiptarët dhe duhet të jetë po aq e hapur ndaj kritikave sa edhe ndaj lavdërimeve.
Çudia më e madhe është se çfarë ndikimi negativ mund të ketë një koment kritik në Facebook apo Instagram për drejtuesit e FSHF-së, kur e dinë se do të mbeten në krye të institucionit për shumë vite të tjera pa i shqetësuar njeri.
