Kryeministri Edi Rama, gjatë vizitës së tij në Shtetet e Bashkuara të Amerikës, është ndalur në kompaninë “Universal Transport” në Michigan, sipërmarrje e drejtuar nga biznesmeni shqiptaro-amerikan Adriatik Sheko.
Kompania operon në industrinë e transportit në SHBA, ndërsa aktiviteti dhe investimet e saj janë shtrirë edhe në Shqipëri.
Rama publikoi në rrjetet sociale pamje nga vizita, duke e cilësuar “Universal Transport” si një sipërmarrje të suksesshme dhe duke vlerësuar rrugëtimin e Adriatik Shekos në sektorin e transportit.
Vizita në kompani vjen në kuadër të qëndrimit disaditor të kryeministrit në SHBA. Rama e nisi axhendën në Michigan me një takim me komunitetin shqiptar që jeton atje.
Në vijim, kreu i qeverisë do të udhëtojë drejt Nju Jorkut, ku do të marrë pjesë në punimet e sesionit të 81-të të Asamblesë së Përgjithshme të Kombeve të Bashkuara.
