Kreu i Grupit Parlamentar të PD, Gazment Bardhi, ka ashpërsuar kritikat ndaj SPAK, duke kërkuar që Prokuroria e Posaçme të veprojë për çështjen e ish-zëvendëskryeministres Belinda Balluku dhe të mos ndikohet, sipas tij, nga llogaritë politike të kryeministrit Edi Rama.
Në reagimin e tij të nëntë radhazi për këtë çështje, Bardhi ngriti pikëpyetje për faktin se SPAK nuk ka depozituar ende në Kuvend një kërkesë për heqjen e imunitetit që do t’i hapte rrugë një mase arresti ndaj Ballukut.
Demokrati iu referua hetimeve dhe sekuestrimit të një pasurie të paluajtshme, duke pretenduar se rëndimi i pozitës penale të Ballukut duhet të shoqërohet edhe me veprime të tjera procedurale nga organi i akuzës. Ai përmendi në këtë kontekst dyshimet për korrupsion, pastrim parash dhe fshehje pasurie.
Sipas Bardhit, SPAK duhet të veprojë në mënyrë të pavarur nga zhvillimet politike dhe të zbatojë ligjin pa pritur lëvizjet e kryeministrit.
“Detyra e SPAK është të zbatojë ligjin, jo të presë Edi Ramën sa të zgjidhë hallet e mëdha politike”, deklaroi Bardhi, duke e akuzuar Prokurorinë e Posaçme se po vonon hapat proceduralë ndaj Ballukut.
Qëndrimi i Bardhit është pjesë e një serie reagimesh të opozitës ndaj mënyrës se si po zhvillohen hetimet për ish-zëvendëskryeministren, ndërsa pretendimet e tij për ndikim politik mbi SPAK mbeten akuza të palës opozitare.
