Partia Demokratike ka kërkuar zhvillimin e një seance dëgjimore publike në Komisionin e Ligjeve, në kuadër të shqyrtimit të ndryshimeve në ligjin “Për statusin e gjyqtarëve dhe prokurorëve në Republikën e Shqipërisë”. Kërkesa e opozitës u pranua nga kreu i komisionit, Ulsi Manja.
Deputeti demokrat Oerd Bylykbashi kërkoi që përpara marrjes së një vendimi të dëgjohen përfaqësuesit e institucioneve dhe shoqatave të sistemit të drejtësisë. Mes tyre janë Këshilli i Lartë Gjyqësor, Këshilli i Lartë i Prokurorisë, Unioni i Gjyqtarëve, Shoqata Kombëtare e Gjyqtarëve, Shoqata e Prokurorëve, Prokurori i Përgjithshëm, drejtuesi i SPAK dhe kreu i Gjykatës së Lartë.
Bylykbashi kritikoi procesin e ndjekur nga Kuvendi, duke argumentuar se projektligji kërkon konsultim të gjerë me grupet e interesit. Sipas tij, vendimet e marra më herët nga KLGJ dhe KLP erdhën si pasojë e mosrespektimit nga Parlamenti të afateve dhe vendimeve të Gjykatës Kushtetuese.
Nga ana tjetër, Ulsi Manja deklaroi se Kuvendi ka marrë me shkrim opinionet e KLGJ-së, KLP-së dhe shoqatave, por pranoi se këto qëndrime nuk mund të zëvendësojnë seancat dëgjimore. Në përfundim, kërkesa e PD-së u miratua dhe seanca me institucionet e drejtësisë u caktua për në orën 13:00.
