Kreu i Partisë Demokratike, Sali Berisha, në konferencën për mediat foli rreth vizitës së tij në Shtetet e Bashkuara, ku mori pjesë në Konventën e Partisë Republikane amerikane si pjesë e delegacionit të IDU-së.
Berisha e cilësoi atë si një prej aktiviteteve më të rëndësishme politike të zhvilluara në SHBA, ndërsa nuk munguan as superlativat për organizimin e republikanëve. Kreu i PD-së deklaroi se 35 vite më parë kishte kërkuar mbështetjen e administratës amerikane dhe të diasporës shqiptare për përmbysjen e diktaturës komuniste, ndërsa këtë herë, sipas tij, kërkoi të njëjtën mbështetje për përmbysjen e asaj që e quan “diktaturë autoritare të bazuar në drogë, krim dhe vjedhjen e shqiptarëve”.
“Unë shkova me një qëllim kryesor: të kërkoj mbështetjen e administratës së SHBA dhe të diasporës tonë, atëherë për përmbysjen e diktaturës totalitare komuniste, kësaj here të diktaturës autoritare të bazuar në drogën, krimin dhe vjedhjen e shqiptarëve”, deklaroi Berisha.
Por përtej paralelizmit që kreu i PD-së ndërtoi mes dy udhëtimeve të ndara nga 35 vite, mbetet një tjetër realitet politik, shumë më pranë Tiranës sesa Uashingtonit.
Berisha shkoi deri në Shtetet e Bashkuara për të kërkuar mbështetjen e diasporës shqiptare për përmbysjen e qeverisë, ndërkohë që sfida e tij kryesore vazhdon të jetë bindja e shqiptarëve brenda Shqipërisë se opozita që drejton përbën një alternativë qeverisëse.
Në fund të fundit, mbështetja ndërkombëtare dhe lidhjet me diasporën mund të kenë peshën e tyre politike, por qeveritë në Shqipëri përcaktohen nga vota. Dhe pikërisht aty Berisha dhe Partia Demokratike kanë ende betejën më të madhe për të fituar.
Kështu, ndërsa kreu i PD-së kërkon përtej Atlantikut mbështetje për “përmbysjen” e qeverisë, paradoksi është se beteja vendimtare nuk ndodhet në Uashington. Ajo është shumë më afër selisë së PD-së. Sepse përpara se të bindë diasporën se qeveria duhet përmbysur, Berishës i duhet të bindë shqiptarët në Shqipëri se ai është alternativa që duhet ta zëvendësojë atë.
