Mungesa e drejtorit të Përgjithshëm të Policisë së Shtetit, Skënder Hita, në mbledhjen e Komisionit të Reformës Zgjedhore shkaktoi debate mes përfaqësuesve të opozitës dhe mazhorancës.
Deputetja demokrate Albana Vokshi kërkoi që mbledhja të mos vijonte pa praninë e kreut të Policisë, duke propozuar shtyrjen e diskutimeve deri në një moment kur Hita të ishte i pranishëm.
Sipas Vokshit, pjesëmarrja e drejtuesit të Policisë ishte e domosdoshme për rëndësinë e çështjeve që trajtohen në këtë komision.
“Unë propozoj që kjo mbledhje të mos zhvillohet me zëvendësdrejtuesit. Mund ta dinim më përpara, sepse ka një komunikim paraprak. Nuk ka asgjë më të rëndësishme se Komisioni i Reformës Zgjedhore”, deklaroi ajo.
Edhe bashkëkryetari socialist i komisionit, Damian Gjiknuri, pranoi se do të ishte më mirë që drejtori i Policisë të ishte prezent, por kundërshtoi ndalimin e punimeve të komisionit.
Gjiknuri argumentoi se roli i komisionit nuk është hetimi i ngjarjeve, por marrja e informacionit dhe diskutimi i problematikave që lidhen me proceset zgjedhore.
Debati mes dy deputetëve u përshkallëzua më tej, pasi Gjiknuri përdori një ton ironik ndaj Vokshit, ndërsa kjo e fundit i kërkoi të mos komentonte jetën e saj personale dhe të fokusohej te çështja në diskutim.
Pas përplasjes verbale, Komisioni i Reformës Zgjedhore vendosi që mbledhja të shtyhej për një datë tjetër.
