Komanda Qendrore e ushtrisë amerikane ka njoftuar se forcat e Shteteve të Bashkuara kanë nisur një valë të re sulmesh ndaj Iranit, duke shënuar natën e pestë radhazi të operacioneve ushtarake.
Në një deklaratë zyrtare, CENTCOM bëri të ditur se sulmet filluan në orën 14:00 sipas kohës lindore të SHBA-së (ET) dhe kanë si objektiv dobësimin e mëtejshëm të kapaciteteve ushtarake iraniane.
"Në orën 14:00 sipas kohës lindore (ET) sot, forcat amerikane filluan të kryejnë një valë të re sulmesh kundër Iranit për natën e pestë radhazi për të dobësuar më tej kapacitetet ushtarake iraniane", thuhet në deklaratë.
Më herët, zëdhënësja e Shtëpisë së Bardhë, Karoline Leavitt, deklaroi se operacionet ushtarake u ndërmorën pasi, sipas Uashingtonit, Irani shkeli memorandumin e mirëkuptimit të arritur mes palëve.
Sipas Leavitt, memorandumi parashikonte që Irani të mos sulmonte anijet tregtare që kalojnë përmes Ngushticës së Hormuzit.
"Konkretisht, në memorandumin e mirëkuptimit që ata nënshkruan, ata nuk duhej të qëllonin ndaj anijeve tregtare që lëviznin përmes Ngushticës së Hormuzit dhe fatkeqësisht, ata morën vendimin tragjik për ta bërë këtë", u shpreh ajo.
Tensionet mes SHBA-së dhe Iranit vijojnë të mbeten të larta, ndërsa përshkallëzimi i fundit ka shtuar shqetësimet për sigurinë në rajonin e Gjirit Persik dhe për lirinë e lundrimit në Ngushticën e Hormuzit.
