Deputeti i Partisë Demokratike për Qarkun e Shkodrës, Kliti Hoti, ka depozituar zyrtarisht një kërkesë për interpelancë me Ministrin e Infrastrukturës dhe Energjisë. Përmes një shkrese drejtuar Kryetarit të Kuvendit, Niko Peleshi, Hoti denoncon mungesën e theksuar të transparencës dhe vonesat serioze në projektet kyçe rrugore që prekin veriun e vendit.
Sipas dokumentit të siguruar nga VNA, deputeti opozitar thekson se prej muajit janar ka kërkuar informacion zyrtar mbi disa projekte, por nuk ka marrë asnjë përgjigje, duke e cilësuar këtë si shkelje të hapur të ligjit për të drejtën e informimit dhe statusit të deputetit.
Deputeti Hoti ka listuar një sërë pyetjesh emergjente për të cilat kërkon llogaridhënie publike nga ministria përgjegjëse:
1. Segmenti rrugor Milot-Balldre
Në çfarë faze ndodhet aktualisht procedura e koncesionit/PPP?
Pse nuk është bërë publik informacioni mbi ofertat dhe vlerësimin e tyre?
Kur pritet shpallja e fituesit, nisja e punimeve dhe përfundimi i projektit?
2. Hyrja e qytetit të Shkodrës
Pse projekti vijon të zvarritet pa një afat të qartë përfundimi?
Cilat janë arsyet e ndryshimeve të vazhdueshme të projektit (rrethrrotullimet, devijimet)?
A është kryer studim i mirëfilltë trafiku apo ky projekt rrezikon të krijojë problematika të reja?
3. Ura e Bahçallëkut
Pse nuk ka avancuar projekti për urën e re dhe cilat janë pengesat konkrete?
A ekziston një afat i qartë për realizimin dhe a ka një studim fizibiliteti?
4. Rruga e Dukagjinit
Në çfarë faze janë punimet dhe cili është afati i parashikuar për përfundimin e plotë?
Cilat janë arsyet konkrete të vonesave dhe a ka një projekt përfundimtar të miratuar?"Mungesa e përgjigjeve, vonesat e pajustifikuara dhe mungesa e transparencës në këto projekte madhore janë shqetësuese dhe kërkojnë llogaridhënie publike," thuhet në kërkesën e deputetit Hoti.
Kjo kërkesë për interpelancë vjen në një kohë kur infrastruktura në veri të vendit mbetet një nga pikat më të nxehta të debatit politik, duke u parë nga opozita si një zonë e lënë qëllimisht në harresë nga investimet qeveritare.
