Procesi i votimit për zgjedhjen e kreut të degës së Partisë Demokratike në Korçë ka nisur me probleme që në orët e para të mëngjesit, duke sjellë ndërprerjen e menjëhershme të procesit.
Përplasjet janë shënuar për listat e anëtarëve me të drejtë vote, ndërsa janë ngritur akuza për manipulim dhe përpjekje për përcaktimin paraprak të fituesit.
Në garë për drejtimin e PD-së dega Korçë ishin Irvin Bode dhe Harito Zoto.
Për shkak të tensioneve dhe kundërshtimeve mbi listat, procesi i votimit është ndërprerë dhe anëtarët e komisionit kanë marrë kutitë e votimit, duke u larguar nga ambientet ku po zhvillohej procesi.
Si pasojë, dega e PD-së në Korçë nuk ka mundur të realizojë zgjedhjen e kryetarit të ri. Tashmë pritet një vendim nga selia qendrore e Partisë Demokratike për hapat e mëtejshëm dhe mënyrën se si do të zgjidhet ngërçi i krijuar.
