Lulzim Basha ka lënë ambientet e SPAK, një orë pasi hyri në Prokurorinë e Posaçme. Ish-kreu i Partisë Demokratike tha për gazetarët se ishte thirrur këtë të enjte në SPAK si një person në dijeni për një nga çështjet nën hetim.
Në një prononcim për mediat ai tha se ishte në cilësinë e personit që ka dijeni për një çështje nën hetim. "Nuk mund të jap detaje në lidhje me çështjen për shkak të sekretit të hetimit. Për çfarë bëhet fjalë duhet të pyesni në prokurori"- tha ish kreu i PD, duke paralajmëruar, ndër të tjera edhe një konferencë për shtyp së shpejti për informacione të tjera.
Sipas burimeve mësohet se Basha, ka shkuar në SPAK për të dhënë shpjegime si person në dijeni lidhur me demonstratën e dhunshme të 21 janarit 2011, gjatë së cilës u vranë.
Basha ka qenë ministër i Brendshëm në kohën kur ndodhi ngjarja e rëndë, e cila nuk u zbardh asnjëherë plotësisht. SPAK vendosi fillimisht të mos fillojë procedimin penal mbi bazën e kallëzimit të të vejës së Aleks Nikës. Por Gjykata e Lartë, pasi shqyrtoi çështjen, vendosi ta urdhërojë Prokurorinë e Posaçme të hetojë rastin. Strasburgu ndërkohë e ka konsideruar 21 janarin si krim shtetëror.
Para godinës së Kryeministrisë u vranë Hekuran Deda, Ziver Veizi, Faik Myrtaj dhe Aleks Nika. Për vrasjen e Myrtajt dhe Veizit janë dënuar me dënime të lehta ish-kreu i Gardës së Republikës, Ndrea Prendi, dhe ish-gardisti Agim Llupo.
Vrasjet e Nikës dhe Dedës vijojnë të mbeten pa autor. SPAK po heton rolin e zyrtarëve të lartë dhe se kush dha urdhrin të qëllohej mbi protestuesit më 21 janar.
