Kryetari i Partisë “Mundësia”, Agron Shehaj, ka deklaruar se mbështetja e tij për një aleancë opozitare në zgjedhjet për Bashkinë e Tiranës varet nga fakti nëse kandidati që do të propozohet do të vijë apo jo nga partitë politike.
Në një intervistë për emisionin “Opinion”, Shehaj u shpreh se një kandidaturë e pavarur është e vetmja mënyrë për të zgjeruar mbështetjen përtej bazës tradicionale të opozitës.
“Jam i bindur që e vetmja zgjidhje për të fituar Bashkinë e Tiranës është të dalim me një kandidat jashtë partive politike. Vetëm kështu mund të shtojmë vota përtej opozitës,” tha ai.
Nga ana tjetër, deputeti i Partisë Demokratike, Belind Këlliçi, theksoi rëndësinë e bashkimit të forcave opozitare përballë Partisë Socialiste. Sipas tij, vetëm një opozitë e bashkuar ka mundësi të fitojë garën për kryeqytetin.
“PD ka pasur takime me të gjitha partitë parlamentare dhe besoj se bashkimi është e vetmja rrugë për të mposhtur PS,” u shpreh Këlliçi.
Ndërkohë, Adriatik Lapaj ka reaguar duke shprehur pakënaqësinë e tij për faktin se, sipas tij, asnjë prej tre emrave kryesorë të opozitës nuk e ka kontaktuar për t’u konsultuar mbi idenë e një kandidature të përbashkët. Ai tha se është e padrejtë që opozita nuk e ka pyetur mbi një ide që, sipas tij, duhet të diskutohet gjerësisht edhe me të.
