Ministrja e Brendshme, Albana Koçiu, komentoi vendimin e Policisë së Shtetit për të mos marrë përsipër sigurinë e protestës së Partisë Demokratike. Ajo tha se arsyeja lidhet me aktet e dhunës gjatë protestave të mëparshme, por efektivët do të jenë në terren për të garantuar rendin dhe sigurinë, siç parashikon ligji për tubimet.
“Ne e kemi thënë që protestat janë e drejtë kushtetuese për të shprehur bindjet apo opinionet në mënyrë paqësore. Sa i përket faktit që Policia nuk e ka miratuar zhvillimin e protestës, kjo lidhet me veprimet e dhunshme në protestat e kaluara. Policia ka për detyrë të ruajë rendin dhe sigurinë”, tha Koçiu.
Ajo shtoi se përgjegjës për aktet e dhunës është kushdo që i kryen ato. “Kushdo që kryen veprim të paligjshëm, pavarësisht nëse protesta është me leje apo pa leje, do të procedohet penalisht sipas rregullave në fuqi”, theksoi ministrja.
