Në ditët e para të marrjes së detyrës, ministrja e Brendshme Albana Koçiu zgjodhi të japë një mesazh të fortë: në këtë ministri nuk falet as tymi i duhanit.
Historia nisi me një qytetar që denoncoi një foto të zv.ministrit Andi Mahila, i cili shfaqej duke konsumuar cigare në një ambient të mbyllur. Një shkelje e vogël, mund të thoshte dikush. Por për ministren Koçiu, ishte një provë e madhe. Dhe vendimi nuk vonoi: ajo propozoi shkarkimin e tij dhe qeveria e miratoi menjëherë.
Kështu, pas katër vitesh në detyrë, Mahila nuk u rrëzua nga skandalet e zakonshme që ndjekin politikën shqiptare – as nga akuzat për korrupsion, as nga tenderat e dyshimtë, as nga lidhjet me botën e krimit. Jo, fundi i tij erdhi nga një cigare. Një moment i shpejtë, një shkrepse, një tym që u kthye në “gabimin fatal”.
Albana Koçiu, përveçse e ashpër në vendim, u kujdes të mbyllte edhe rrethin e transparencës: njoftoi qytetarin denoncues se drejtësia administrative ishte vënë në lëvizje.
Në një vend ku zakonisht ndëshkimi i shpejtë shihet vetëm në fushën e sportit, duket se ministrja e re e Brendshme vendosi ta aplikojë këtë rregull edhe në politikë. Një cigare – një karrierë.
