Të paktën tre palestinezë janë vrarë nga zjarri izraelit në dy incidente të ndara në Rripin e Gazës, njoftuan autoritetet lokale shëndetësore, teksa tensionet vijojnë të rriten pavarësisht armëpushimit të arritur në tetor.
Sipas mjekëve, një palestinez u vra në lagjen Tuffah të qytetit të Gazës, zonë nën kontroll palestinez, ndërsa dy të tjerë u vranë në jug të Gazës, në qytetin Bani Suhaila, në lindje të Khan Younis, një zonë që ende mbahet e pushtuar nga Izraeli.
Ushtria izraelite deklaroi se forcat e saj qëlluan ndaj një “terroristi” që kishte hyrë në një zonë nën kontrollin e tyre në veri të Rripit të Gazës, duke përbërë, sipas saj, një kërcënim të menjëhershëm. Në jug të Gazës, ushtria izraelite tha se kishte vrarë një tjetër “terrorist” në një sulm ajror, pasi ai iu afrua trupave izraelite që operonin në zonë.
Luftimet janë zbehur ndjeshëm që nga armëpushimi i tetorit, i arritur pas dy vitesh luftë mes Izraelit dhe Hamasit, por nuk janë ndalur plotësisht. Të dyja palët kanë shkëmbyer akuza për shkelje të marrëveshjes.
Një zyrtar i Hamasit i tha Reuters se grupi u ka bërë thirrje ndërmjetësve të ndërhyjnë për të ndalur “vrasjet e përditshme izraelite që synojnë të minojnë marrëveshjen e armëpushimit”.
Sipas autoriteteve shëndetësore në Gaza, që nga hyrja në fuqi e armëpushimit janë vrarë mbi 440 palestinezë, shumica civilë, si dhe tre ushtarë izraelitë.
