Presidenti amerikan Donald Trump ka dërguar trupa nga Kalifornia në Oregon, pasi një gjykatë i refuzoi kërkesën për të vendosur Gardën Kombëtare në Portland.
Ky vendim anashkalon urdhrin e gjykatës duke përdorur ushtarë të Gardës Kombëtare që ishin ende të angazhuar në Los Angeles. Guvernatori i Kalifornisë, Gavin Newsom, paralajmëroi një padi, duke e cilësuar këtë si një “shkelje të paprecedentë të ligjit”. Ndërkohë, guvernatori i Illinois-it, JB Pritzker, tha se Trump po zhvendoste edhe Garda Kombëtare të Teksasit në shtete të tjera.
Pentagoni konfirmoi se 200 pjesëtarë të Gardës Kombëtare të Kalifornisë janë zhvendosur në Portland për të mbështetur autoritetet federale dhe agjentët e emigracionit. Nga Shtëpia e Bardhë, zëdhënësja Abigail Jackson tha se presidenti kishte vepruar “ligjërisht për të mbrojtur pronën dhe forcat federale nga protestat e dhunshme”.
Newsom reagoi ashpër, duke e akuzuar presidentin se po përdor ushtrinë si “armë politike kundër qytetarëve amerikanë” dhe se po shpërfill vendimet e gjykatave. “Kjo nuk ka të bëjë me sigurinë publike, por me pushtetin”, u shpreh ai.
Ndërkohë, në Illinois, Pritzker deklaroi se Trump ka urdhëruar vendosjen e 400 pjesëtarëve të Gardës Kombëtare të Teksasit në shtete si Illinois dhe Oregon, duke e cilësuar këtë një “abuzim me pushtetin”.
Qyteti i Portlandit është prej kohësh në shënjestër të Trump, i cili e ka akuzuar se është strehë e aktivistëve të Antifa-s, të cilën ai e ka shpallur organizatë terroriste të brendshme.
Vendosja e trupave në Portland erdhi një ditë pasi Trump miratoi dërgimin e 300 pjesëtarëve të Gardës Kombëtare edhe në Çikago, ku protestat kundër politikave të emigracionit kanë degjeneruar në dhunë. Guvernatori Pritzker tha se presidenti po “prodhohej një krizë të rreme” për të justifikuar vendosjen e ushtrisë.
“Administrata po përpiqet të krijojë një zonë lufte që të ketë arsye të dërgojë edhe më shumë trupa”, tha ai për CNN.
