Shtetet e Bashkuara kanë vendosur të pezullojnë përkohësisht përpunimin e vizave imigruese për 75 vende të botës. Vendimi hyn në fuqi më 21 janar dhe do të zgjasë për një afat të pacaktuar, deri në një rishikim të plotë të procedurave nga Departamenti Amerikan i Shtetit.
Sipas autoriteteve amerikane, masa synon të forcojë kontrollin ndaj aplikantëve që mund të konsiderohen si “barrë publike”, pra persona që mund të varen nga ndihmat sociale dhe përfitimet shtetërore në SHBA.
Një memorandum i brendshëm i Departamentit të Shtetit u kërkon zyrtarëve konsullorë që të refuzojnë aplikimet për vizë në bazë të ligjit ekzistues, ndërkohë që po rishikohen rregullat e kontrollit dhe verifikimit të aplikantëve.
Somalia është vënë nën vëmendje të veçantë pas një skandali të madh mashtrimi me fondet publike në shtetin e Minesotës, ku u zbuluan abuzime të gjera me programet e ndihmës sociale. Shumë nga të përfshirët ishin shtetas somalezë ose amerikanë me origjinë somaleze.
Sipas udhëzimeve të reja, vizat mund të refuzohen bazuar në faktorë si: gjendja shëndetësore, mosha, njohja e gjuhës angleze, gjendja financiare, si dhe nevoja e mundshme për kujdes mjekësor afatgjatë. Edhe persona që kanë përfituar ndihma shtetërore në të kaluarën mund të penalizohen.
Zëdhënësi i Departamentit të Shtetit deklaroi se SHBA do të përdorë autoritetin ligjor për të parandaluar hyrjen e emigrantëve që mund të shfrytëzojnë sistemin e ndihmës sociale amerikane.
Përjashtimet nga ky pezullim do të jenë shumë të kufizuara dhe do të lejohen vetëm pasi aplikantët të kalojnë vlerësimet lidhur me kriterin e “barrës publike”.
Lista e plotë e shteteve të prekura nga pezullimi i vizave:
Afganistan, Shqipëri, Algjeri, Antigua dhe Barbuda, Armeni, Azerbajxhan, Bahamas, Bangladesh, Barbados, Bjellorusi, Belize, Butan, Bosnje dhe Hercegovinë, Brazil, Mianmar (Burma), Kamboxhia, Kamerun, Kepi i Gjelbër, Kolumbi, Bregu i Fildishtë, Kubë, Republika Demokratike e Kongos, Dominikë, Egjipt, Eritre, Etiopi, Fixhi, Gambia, Gjeorgji, Gana, Grenadë, Guatemalë, Guine, Haiti, Iran, Irak, Xhamajkë, Jordani, Kazakistan, Kosovë, Kuvajt, Kirgistan, Laos, Liban, Liberi, Libi, Maqedonia e Veriut, Moldavi, Mongoli, Mali i Zi, Marok, Nepal, Nikaragua, Nigeri, Pakistan, Republika e Kongos, Rusi, Ruandë, Shën Kits dhe Nevis, Shën Luçia, Shën Vincent dhe Grenadinet, Senegal, Sierra Leone, Somali, Sudani i Jugut, Sudan, Siri, Tanzani, Tajlandë, Togo, Tunizi, Ugandë, Uruguai, Uzbekistan dhe Jemen.
Pezullimi do të mbetet në fuqi derisa Departamenti i Shtetit të përfundojë rishikimin e plotë të procedurave të vizave./FoxNews
Burimi: https://www.foxnews.com/politics/us-freezes-all-visa-processing-75-countries-including-somalia-russia-iran
