I rrëzuari nga pushteti, presidenti i Venezuelës Nicolás Maduro, është vetë-deklaruar i pafajshëm të hënën në një gjykatë federale në Nju Jork për akuzat e narco-terrorizmit, disa ditë pasi u kap nga forcat amerikane në një operacion që ka tronditur udhëheqësit botërorë dhe ka futur në kaos autoritetet në Karakas.
Maduro, 63 vjeç, u paraqit para gjykatës federale ku u deklarua i pafajshëm për katër akuza penale, përfshirë narco-terrorizmin, komplot për importimin e kokainës, si dhe posedim të mitralozëve dhe mjeteve shpërthyese. “Jam i pafajshëm. Nuk jam fajtor. Jam një njeri i ndershëm. Jam ende presidenti i vendit tim”, tha Maduro përmes një përkthyesi, para se të ndërpritej nga gjyqtari federal Alvin Hellerstein.
Edhe bashkëshortja e tij, Cilia Flores, u deklarua e pafajshme. Seanca e radhës gjyqësore është caktuar për datën 17 mars.
Sipas akuzave amerikane, Maduro ka mbikëqyrur një rrjet trafiku kokaine që ka bashkëpunuar me grupe të dhunshme, përfshirë kartelët meksikanë Sinaloa dhe Zetas, ish-rebelët kolumbianë të FARC-it dhe bandën venezueliane Tren de Aragua. Maduro i ka mohuar prej vitesh këto akuza, duke i cilësuar ato si një mbulesë për interesa imperialiste ndaj rezervave të pasura të naftës së Venezuelës.
