Fushata elektorale e Zohran Mamdani-t, socialistit demokrat që fitoi zgjedhjet për kryetar bashkie në Nju Jork, tërhoqi mijëra mbështetës — por pas suksesit të tij qëndronte edhe bashkëshortja e tij, Rama Duwaji, një artiste pro-palestinës që ndihmoi në ngritjen e imazhit të tij në rrjete sociale dhe krijoi logon karakteristike të fushatës.
Një Zonja e Parë ndryshe për qytetin që nuk fle
Të martën, sipas projeksioneve të mediave amerikane, votuesit zgjodhën Zohran Mamdani-n si kryebashkiakun e ri të Nju Jorkut. Ai u pa duke votuar në Queens së bashku me bashkëshorten e tij, Rama Duwaji.
Ndryshe nga Zonja e Parë e Shteteve të Bashkuara, bashkëshortja e kryetarit të Nju Jorkut nuk ka një rol zyrtar në drejtimin e qytetit, por shpesh bie në qendër të vëmendjes publike. Për Mamdani-n, i cili është mysliman dhe figurë e re në politikë, interesi ndaj jetës së tij familjare ka qenë i madh.
Kush është Rama Duwaji
Rama Duwaji, 28 vjeç, është një artiste dhe animatore siriano-amerikane që jeton në Brooklyn. E lindur në Houston, Teksas, ajo u zhvendos në Dubai në moshën 9-vjeçare dhe më vonë studioi në Virginia Commonwealth University School of the Arts në Katar, përpara se të përfundonte studimet në Richmond dhe Nju Jork.
Veprat e saj janë publikuar nga BBC, The New Yorker dhe Vogue. Duwaji punon kryesisht me media digjitale, por edhe me qeramikë, dhe artet e saj shpesh mbartin mesazhe të forta politike – përfshirë kritika ndaj veprimeve të Izraelit në Gaza dhe reflektime mbi krizat në Lindjen e Mesme.
Në një intervistë për YUNGmagazine, ajo tha:
“Kohët e fundit, fokusohem te arti që lidhet me përvojat e mia dhe gjërat që më interesojnë. Komuniteti që lind nga bisedat rreth veprave të mia formohet në mënyrë natyrale, si online, ashtu edhe në jetën reale.”
Një nga veprat e saj më të njohura është logoja e fushatës së Mamdani-t — emri “Zohran” në të verdhë me hije të kuqe, mbi një sfond blu demokratik, që tashmë është bërë simbol i njohur në Nju Jork.
Si u njohën Zohran dhe Rama
Çifti u njoh në aplikacionin e njohjeve Hinge në vitin 2021, pak pas zgjedhjes së Mamdani-t në Asamblenë e Shtetit të Nju Jorkut. Ata u martuan në City Hall të Nju Jorkut më herët këtë vit, në një ceremoni të thjeshtë që u fotografua nga mikja e tyre Kara McCurdy.
Në maj, Mamdani publikoi disa foto nga dasma në Instagram, duke iu përgjigjur kritikave dhe sulmeve online ndaj bashkëshortes së tij gjatë fushatës:
“Rama nuk është vetëm bashkëshortja ime, por një artiste e jashtëzakonshme që meriton të njihet për punën e saj. Mund të kritikoni idetë e mia, por jo familjen time,” – shkroi ai.
Ndërkohë, Duwaji publikoi një postim ku shkruante:
“S’mund të isha më krenare,” duke ndarë imazhe nga fushata dhe momente me bashkëshortin e saj.
