Të paktën 11 palestinezë, përfshirë dy djem dhe tre gazetarë, u vranë të mërkurën në Rripin e Gazës nga zjarri izraelit, njoftuan mjekë lokalë. Ushtria e Izrael tha se kishte “eliminuar” një militant palestinez që, sipas saj, përbënte kërcënim për ushtarët.
Sipas autoriteteve shëndetësore palestineze, një sulm ajror izraelit në Gazën qendrore goditi një automjet ku udhëtonin tre gazetarë, duke i lënë ata të vdekur në vend. Gazetarë lokalë i thanë Reuters se ata ndodheshin në një mision të sponsorizuar nga Komiteti Egjiptian, i cili mbikëqyr ndihmën humanitare të Egjiptit në Gaza, për të filmuar kampet me çadra të ndërtuara për palestinezët e zhvendosur. Një burim i sigurisë egjiptiane konfirmoi se automjeti i përkiste komitetit, ndërsa ushtria izraelite nuk reagoi menjëherë ndaj kërkesës për koment.
Në incidente të tjera gjatë së njëjtës ditë, mjekët palestinezë raportuan se tre persona, mes tyre një djalë 10-vjeçar, u vranë nga granatimet e tankeve izraelite në lindje të Deir al-Balahut, në Gazën qendrore. Dy të tjerë, një djalë 13-vjeçar dhe një grua, humbën jetën në dy raste të ndara të të shtënave izraelite në lindje të Khan Younisit, në jug të Gazës. Tre palestinezë të tjerë u vranë në incidente të veçanta, duke e çuar bilancin ditor në të paktën 11 viktima, sipas Ministrisë së Shëndetësisë të drejtuar nga Hamas në Gaza.
Banorët thanë se incidentet ndodhën në zona nën kontroll palestinez. Armëpushimi i tetorit solli një tërheqje të pjesshme të forcave izraelite, por ato vijojnë të mbajnë rreth 53% të territorit të Gazës dhe, sipas banorëve, kanë zgjeruar gradualisht praninë javët e fundit, duke shkaktuar zhvendosje të reja të familjeve palestineze.
Marrëveshja e ndërmjetësuar nga SHBA për armëpushimin e tetorit nuk ka avancuar përtej fazës së parë, ku luftimet kryesore u ndalën, disa forca izraelite u tërhoqën dhe Hamas liroi pengje në këmbim të të burgosurve palestinezë. Palët mbeten në mosmarrëveshje për hapat e mëtejshëm, përfshirë planin 20-pikësh të paqes të propozuar nga presidenti amerikan Donald Trump.
