Një tjetër viktimë e urisë në Gaza është regjistruar këtë javë. Mediat lokale raportojnë se ka ndërruar jetë akademiku, shkrimtari dhe poeti palestinez Omar Harb, i cili ishte gjithashtu lektor universitar. Sipas burimeve, ai vdiq si pasojë e kequshqyerjes së rëndë, e shkaktuar nga bllokada disa mujore izraelite që ka paralizuar dhe gjunjëzuar enklavën palestineze.
Shëndeti i Harbit ishte përkeqësuar dukshëm gjatë javëve të fundit. Në një intervistë të dhënë së fundmi për Al Jazeera, ai kishte rrëfyer se përpara fillimit të konfliktit në tetor të vitit 2023 peshonte 120 kilogramë, ndërsa tani kishte mbetur me më pak se 40 kilogramë. Në fjalët e tij prekëse, vetëm tre javë para se të ndërronte jetë, Harb kishte përshkruar vuajtjet e përditshme, duke thënë se i ishte lutur për ushqim, ilaçe dhe ndihmë mjekësore, por nuk kishte marrë asgjë. Ai kishte kërkuar gjithashtu një karrocë për persona me aftësi të kufizuara, të cilën nuk arriti kurrë ta siguronte.
“Kam parë fotografitë e mia para dhe pas luftës dhe mendova: si është e mundur që njeriu të arrijë në këtë gjendje? Nuk e di pse jemi në këtë pikë. Njerëzit po vuajnë, dhe askush nuk i kushton vëmendje kësaj vuajtjeje”, ishte shprehur ai.
Përveç vuajtjes fizike, Harb kishte përjetuar edhe një humbje të rëndë familjare. Gjatë luftës ai kishte humbur 26 anëtarë të familjes, përfshirë bashkëshorten, fëmijët, nipërit dhe mbesat. Ky fakt e kishte rënduar edhe më shumë gjendjen e tij shëndetësore.
Raportet ndërkombëtare bëjnë të ditur se numri i përgjithshëm i vdekjeve të lidhura me urinë në Gaza është rritur tashmë në 370 persona, shumica prej të cilëve janë fëmijë, gra dhe të moshuar. Sipas të dhënave, kushtet e jetesës në enklavë janë bërë pothuajse të pamundura për shkak të mungesës së ushqimit, ujit të pijshëm dhe ilaçeve.
Edhe pse Omar Harb kishte marrë njoftim se do të evakuohej nga Gaza gjatë muajit të Ramazanit vitin e kaluar, më vonë iu komunikua se emri i tij nuk figuronte në listën e të evakuuarve. Kjo e la atë të bllokuar në një zonë ku uria dhe bombardimet kanë marrë mijëra jetë. Vdekja e tij ka shkaktuar tronditje të madhe në opinionin publik palestinez dhe ndërkombëtar, duke u bërë simbol i vuajtjeve ekstreme që po përjetojnë banorët e Gazës nën bllokadën izraelite.
