Ramazan Mataj, 33 vjeç, u qëllua për vdekje me breshëri armësh në zonën e Dragoçit, Postribë, Shkodër, ndërsa po kthehej në shtëpinë e tij. Ngjarja ndodhi mbrëmjen e djeshme, kur viktima udhëtonte me një automjet tip Benz. Trupi i pajetë i tij u gjet mëngjesin e sotëm nga banorët e zonës.
Rreth orës 22:00 të mbrëmjes, Mataj kishte komunikuar për herë të fundit me të atin, pa shfaqur ndonjë shqetësim. Pas këtij momenti, dyshohet se ai është ekzekutuar. Një banor i zonës dëshmoi se kishte dëgjuar të shtëna, por duke qenë se pranë vendit të ngjarjes ndodhej një lokal dasmash, mendoi se bëhej fjalë për fishekzjarre.
Babai i viktimës, Fatmir Mataj, i tronditur nga ngjarja, deklaroi se i biri nuk kishte asnjë konflikt dhe kërkoi zbardhjen e rastit. “Djali im është rritur me shumë sakrifica. Nuk ka qenë aspak person problematik. Kam folur me të në orën 22:00 dhe nuk më shprehu ndonjë shqetësim. Kërkoj të zbardhet e vërteta,” tha ai.
Edhe xhaxhai i viktimës, Naim Mataj, hodhi poshtë mundësinë e ndonjë konflikti. Ai sqaroi se Ramazani kishte punuar në Malin e Zi dhe më herët kishte jetuar në Belgjikë. “Ramazani punonte si mjeshtër në Malin e Zi. Para një viti e gjysmë ishte kthyer nga Belgjika, ndërsa së fundmi jetonte dhe punonte në Malin e Zi. Vëllai i tij ndodhet ende në Belgjikë. Kanë kaluar një jetë të vështirë ekonomikisht, por nuk dimë të kenë pasur konflikte,” u shpreh Naim Mataj.
Policia është duke hetuar për të zbardhur motivet e krimit, duke vlerësuar mënyrën e ekzekutimit, që sugjeron një mllef të madh ndaj viktimës. Pasi Ramazan Mataj nuk figuron i skeduar në Shqipëri, hetimet janë përqendruar te e kaluara e tij dhe e vëllait në Belgjikë. Njëkohësisht, do të kërkohet ndihma e autoriteteve të Malit të Zi, ku ai punonte prej kohësh.
