Engert Pëllumbi ndoshta nuk është një emër kaq i njohur për publikun. Megjithatë, kush e ka ndjekur politikën me vëmendje e ka fiksuar si emrin që ka dënuar ish-ministrin e Brendshëm Saimir Tahiri. Më 5 shkurt të vitit 2022, trupa gjykuese e komanduar nga KLGJ për të shpallur vendimin për ish-ministrin Saimir Tahiri, e kryesuar nga Engert Pëllumbi dhe anëtarë Igerta Hysi dhe Florian Kalaja, dha dënimin me 3 vite e 4 muaj burg dhe për 3 vite të tjera të mos ushtrojë asnjë funksion publik për veprën penale “Shpërdorim detyre”.
Por më herët, Engert Pëllumbi ka pasur një përplasje dhe me një tjetër deputete të PS. Në vitin 2011, ai gjobiti për shpifje nënkryetaren e Kuvendit të Shqipërisë, Ermonela Felajn.
Me vendimin e sotëm ndaj Sali Berishës, vështirë që të gjesh një motivim politik për një gjyqtar që në punën e tij është ndeshur me sukses me njerëz me pushtet, duke treguar integritet të lartë dhe qasje profesionale ndaj dosjeve “të nxehta”.
Engert Pëllumbi do të mbahet mend gjatë si gjyqtari që dërgoi në qeli funksionarin e parë të lartë shtetëror. Që tashmë nuk është më një rast i izoluar, por një proces i gjatë, i plotë dhe i vështirë, iniciuar nga struktura e Prokurorisë së Posaçme.
