Edi Rama, ministra dhe kryetarë bashkie të zgjedhur të PS kanë zbarkuar sot paradite në Athinë për të organizuar një takim me shqiptarët e Greqisë. Ky takim i paralajmëruar disa javë më parë dhe i shoqëruar me polemika mes politikës në Greqi dhe në Shqipëri, zhvillohet fiks në ditën ku një vit më parë u ndalua për shitblerje votash kandidati i opozitës për Himarën Fredi Beleri. Që prej asaj dite marrdhëniet mes dy vendeve kanë qenë të acaruara, Greqia e zemëruar për arrestimin e minoritarit Beleri dhe Shqipëria e qartë që po zbaton drejtësinë. Zyrtarë të lartë grekë kanë paralajmëruar se Fredi Beleri do të jetë kandidati i partisë së kryeminstrit Micotaqis për parlamentin europian. Pak ditë pas këtij lajmi, Edi Rama paralajmëroi takimin me shqiptarët e Greqisë, një komunitet i madh këto 30 vitet e fundit. Edhe pse mund të dukej si ndërhyrje për zgjedhjet e parlamentit europian që zhvillohen pas pak ditësh, Rama nuk hoqi dorë duke treguar forcën me qeverinë greke. Pavarësisht notave nacionaliste dhe zhurmës që shoqëron takimin e sotëm të Edi Ramës me shqiptarët e Greqisë, pakkush ka në vëmendje se arsyeja e vërtetë e takimit është vota e emigrantëve. Diçka e premtuar por kurrë e realizuar. Aq më tepër po të mendosh se zgjedhjet e ardhshme parlamentare janë thjesht 1 vit larg.
