Në ditën e tretë të arrestimit të Erjon Veliajt, duket se Edi Rama i ka lënë pas akuzat për prokurorët e SPAK dhe gjykatësin e GJKKO për t’iu rikthyer aktivitetit normal të propagandës për “arritjet e qeverisë”.
“Jam shumë i gëzuar se sapo u mbyll me sukses procesi i eurobondit 10-vjeçar, sapo morëm dritën jeshile që mund ta ndajmë këtë me opinionin publik,” tha kryeministri në një komunikim live në rrjetet sociale, ndërkohë që “eurobondi” në vetvete është një terminologji teknike që e kuptojnë vetëm ata që merren me këtë punë. Aq më pak mund të ketë ndonjë interes për publikun, i cili është në ethet lajmeve dhe rragimeve pas arrestimit të Erion Veliajt.
Më herët gjatë ditës, Edi Rama postoi dhe foton e një bufi kënete që, sipas tij, është i ngjashëm me Sali Berishën. Por retorika e sotme e Edi Ramës është shumë larg asaj të dy ditëve më parë me sulme ndaj SPAK dhe kërcënime për drejtësinë.
Të ketë ndryshuar mendim për Prokurorinë e Posaçme dhe dosjen Veliaj? Apo ndoshta po përgatitet për strategjinë e re ku kryetari i bashkisë është thjesht viktima, por vëmendja duhet përqendruar tek zgjedhjet?
Mbetet për t’u parë në ditët në vazhdim se ç’rrugë do të zgjedhë Edi Rama për t’u qasur me çështjen Veliaj dhe fushatën për zgjedhjet parlamentare të 11 majit.
