Holta Zaçaj, anëtarja e Gjykatës Kushtetuese, po përballet me kritika lidhur me qëndrimet e saj kontradiktore për kohëzgjatjen e mandatit të saj. Dokumentet e publikuara nga gazetarja Esjona Konomi zbulojnë një ndryshim të qëndrimit të saj nga viti 2022 deri më sot.
Në shkurt 2022, Zaçaj i dërgonte një kërkesë Këshillit të Emërimeve në Drejtësi (KED) dhe Gjykatës së Lartë, duke kërkuar të shqyrtohej aplikimi i saj për mandatin e mbetur të Gjykatës Kushtetuese. Në kërkesën e saj specifikohej qartë që bëhej fjalë për mandatin që përfundon në mars 2025, duke e bërë të qartë se e kuptonte kufizimin kohor të këtij mandati.
Në deklaratat e saj të fundit, Zaçaj ka theksuar se nuk është e sigurt se kur përfundon mandati i saj dhe ka njoftuar se do të kërkojë një opinion nga Komisioni i Venecias për ta sqaruar këtë çështje.
