“Ishte një konkurs fiktiv, një garë e paracaktuar, e ndikuar nga grupe interesi, e ndikuar nga krimi i organizuar, grupet kriminale të Durrësit. Nuk u bë asnjë transparencë, nuk dëgjuam asnjë nga kandidatët, të ketë një intervistë publike, të kuptojmë aftësitë e gjithësecilit. Nuk dua ta paragjykoj zotin Proda, por fakti që ka patur proces fiktiv, që KM ka preferuar të takojë disa nga kandidatët, njërin prej të cilëve e ka takuar dje, mes tyre ka takuar edhe zotin Proda. Ka qenë garë fiktive, propagandë. Në mendjen e KM ka qenë zoti Proda." tha Lala
Kandidatura e zotit Proda për postin e kreut të Policisë së Shtetit është duke pritur zyrtarizimin nga kryeministri, pas largimit të Muhamet Rrumbullakut me dorëheqje në shtator. Proda, me një karrierë 19-vjeçare në Policinë e Shtetit, ka shërbyer që nga viti 2021 në Elbasan, fillimisht si zv.drejtor për hetimin e krimeve dhe më pas si drejtor i Drejtorisë Vendore të Policisë. Megjithatë, procesi i ngjitjes së tij drejt postit të lartë nuk ka kaluar pa pikëpyetje.Një nga çështjet më të rëndësishme që hedhin hije mbi kandidaturën e tij është dyshimi për dekonspirimin e një operacioni të madh ndërkombëtar që synonte arrestimin e anëtarëve të grupit kriminal Çopja. Proda është pjesë e një grupi zyrtarësh të policisë dhe të Byrosë Kombëtare të Hetimit që po verifikohen nga Prokuroria e Posaçme për këtë çështje. Operacioni kishte lëshuar 33 urdhër-arreste ndaj kësaj organizate kriminale, por vetëm 13 prej tyre u ekzekutuan, ndërsa pjesa tjetër arriti t’i shpëtojë prangave. Ky fakt ka ngritur dyshime mbi mënyrën se si u menaxhua operacioni dhe mundësinë e dekonspirimit.
I kontaktuar nga BIRN përmes telefonit, Proda pranoi se telefoni i tij celular ishte aktualisht i sekuestruar si pjesë e hetimit dhe po i nënshtrohej ekspertimit, për rrethana që ai tha se nuk mund t’i bënte publike për të “mos cënuar sekretin hetimor”.
Proda shtoi gjithashtu se janë sekuestruar dhe telefona të oficerëve dhe drejtuesve të tjerë të policisë, si dhe të hetuesve të Byrosë Kombëtare të Hetimit.
“Operacioni kishte të bënte vetëm me ekzekutimin e urdhër-ndalimeve, ndërsa hetimet për organizatën kriminale në fjalë u kryen nga vetë Prokuroria e Posaçme,” tha Proda.
