Prokuroria e Posaçme Kundër Korrupsionit dhe Krimit të Organizuar (SPAK) ka goditur një organizatë të dyshuar kriminale të trafikut ndërkombëtar të drogës dhe pastrimit të parave, e cila dyshohet se ka qarkulluar dhe investuar qindra milionë euro në Shqipëri dhe jashtë saj. Detaje nga operacioni janë bërë publike nga gazetarja Klodiana Lala, e cila në emisionin “Të Paekspozuarit” në MCN TV ka deklaruar se hetimet kanë nisur prej vitit 2020 dhe janë thelluar në vitin 2025 pas zbërthimit të komunikimeve të enkriptuara të platformës SKY ECC.
Sipas Lalës, në qendër të hetimeve dyshohet të jetë shtetasi Shpëtim Aliu, i cili konsiderohet si figurë kyçe e një rrjeti të strukturuar kriminal që operonte në disa shtete.
“Bëhet fjalë për një organizatë, me disa grupime që kanë bashkëvepruar. Secili prej grupimeve ka patur një kre dhe organizator,” – deklaroi Lala, duke shtuar se grupimet furnizoheshin nga i njëjti person.
Ajo theksoi se hetimi ka nisur pas një referimi të policisë në SPAK në maj të vitit 2020, ku dyshohej për përfshirjen e Aliut në trafikun e lëndëve narkotike dhe për pastrim parash të lidhur me rrjete biznesi në Shqipëri.
“Në vitin 2025, nga një tjetër dosje penale, është zbërthyer kodi i SKY ECC… Shpëtim Aliu, personazh i larguar herët në Elbasan, i vendosur në Ekuador, por frekuentonte edhe Dubain,” – u shpreh Lala.
Ajo shtoi se Aliu dyshohet se ka krijuar lidhje me kartele në Ekuador, duke siguruar sasi të mëdha kokaine për tregun evropian. “Grupi i drejtuar nga Shpëtim Aliu bashkëpunonte me katër grupe: të Dritan Gjikës, Eldi Dizdarit, Armando Pacanit dhe grupin e Sokol Bibaj,” – tha Lala.
Ajo shtoi se disa prej këtyre grupeve dyshohet se kanë operuar përmes bizneseve të ligjshme dhe investimeve në ndërtim, duke pastruar shuma të mëdha parash.
“Shumat që fitonin ishin marramendëse dhe investoheshin në ndërtim,” – u shpreh Lala, duke shtuar se SPAK ka sekuestruar rreth 150 milionë euro pasuri, përfshirë vila, hotele dhe toka.
Ajo përmendi gjithashtu përdorimin e kriptomonedhave dhe kompanive të vogla si mënyra për të futur paratë në tregun shqiptar. SPAK ka lëshuar 10 urdhër-arreste, ndërsa një prej tyre është ekzekutuar. Personat e tjerë ndodhen në kërkim.
