Mijëra protestues janë grumbulluar edhe këtë të hënë në qendër të Tiranës, duke shënuar ditën e 16-të të protestës qytetare kundër qeverisë.
Përmes thirrjeve “Ju erdhi fundi”, “Dorëheqje” dhe “Rama jep dorëheqjen”, qytetarët kanë përsëritur kërkesën e tyre për largimin e kryeministrit Edi Rama. Në bulevardin “Dëshmorët e Kombit” nuk munguan pankartat dhe sloganet që kanë shoqëruar protestën gjatë ditëve të fundit.
Një nga thirrjet më të dëgjuara ishte edhe slogani “Rama në burg, Berisha në burg”, i cili u përsërit disa herë nga protestuesit gjatë tubimit.
Në foltore u ngjitën qytetarë dhe aktivistë, shumica e tyre të ardhur nga diaspora, të cilët folën për korrupsionin, gjendjen politike në vend dhe nevojën për ndryshim. Protesta u shoqërua edhe nga kënga “Rama jep dorëheqjen”, tashmë një prej simboleve të këtyre tubimeve.
Aktivisti Arben Kola u bëri thirrje pjesëmarrësve të shmangin provokimet, duke iu referuar lëvizjes së një grupi protestuesish drejt Rinasit një natë më parë. Ai theksoi se itinerari i protestës mbetet i përcaktuar brenda Unazës së Madhe të Tiranës dhe kërkoi që ky itinerar të respektohet.
Ashtu si në mbrëmjet e mëparshme, protesta u mbyll përpara godinës së Kryeministrisë dhe më pas vijoi me marshimin në rrugët e kryeqytetit.
