Jo vetëm qeveri me "teknikë", por edhe deputetë pa asnjë angazhim politik. Kjo pritet të ndodhë me PS-në dhe listën e ardhshme të mazhorancës për zgjedhjet e vitit 2025.
Për të promovuar këtë format, Edi Rama zgjodhi sot Romina Kukon, e cila në një intervistë për TCH deklaroi se kandidatët për deputetë të PS-së do të zgjidhen kryesisht nga platforma "Deputeti që duam", ku kanë aplikuar të paktën 100 persona. Kjo platformë, e drejtuar nga Bora Muzhaqi, pritet të nxjerrë edhe kandidaturat teknike që do t’i bashkohen Ramës në përballjen e ardhshme elektorale.
Edhe pse paraqitet si një risi që do të angazhojë të rinjtë në politikë, mbledhja e emrave dhe renditja e tyre sipas dëshirës së kryetarit është tashmë modeli i partive shqiptare. Ky model, i konfirmuar me konsensusin e votës PS-PD në parlament përmes ndryshimeve në kodin zgjedhor, i ka dhënë Ramës dhe Berishës autoritetin për të vendosur të preferuarit e tyre në listat fituese.
Ndërsa kryeministri pretendon se me Bora Muzhaqin dhe Romina Kukon do të sjellë një model të ri në parlament, vetë promovueset e këtij modeli janë figura të përzgjedhura pa ndonjë konkurs apo angazhim në PS. Me bashkëpunëtorë që në pjesën më të madhe janë në burg, në arrati ose nën hetim, Edi Rama po përpiqet të përdorë fasadën e "teknikëve" për të larguar njollën e korrupsionit që ka përfshirë PS-në.
Nëse ndryshimet e fundit në qeveri me emra anonimë dhe pa asnjë kontribut politik në PS ishin surprizë dhe u përdorën si “larje” e mëkateve të paraardhësve, me gjasë në parlamentin e ardhshëm do të kemi një numër të madh anonimësh që do të komandohen dhe lëvizin lehtësisht në fushën ku "shefi i madh" vendos rregullat e lojës dhe rolin e gjithsecilit.
