Çokollata nuk është vetëm një nga ëmbëlsirat më të pëlqyera në botë, por edhe një ushqim që mund të sjellë përfitime të rëndësishme për shëndetin kur konsumohet me masë. Sipas ekspertëve të ushqyerjes, përbërësit që gjenden në kakao ndihmojnë në mbrojtjen e sistemit kardiovaskular, reduktimin e inflamacionit dhe përmirësimin e qarkullimit të gjakut.
Abbie Gellman, shefe në Institutin e Edukimit Kulinar, thekson se çokollata përmban antioksidantë dhe aminoacide të vlefshme për organizmin. Veçanërisht e pasur me flavonoide, çokollata e zezë konsiderohet zgjedhja më e shëndetshme. Një porcion i saj mund të sigurojë rreth 140 miligramë flavonoide, substanca që lidhen me uljen e rrezikut të sëmundjeve kardiovaskulare.
Ekspertët rekomandojnë zgjedhjen e çokollatës me përqindje të lartë kakaoje, pasi sa më e madhe të jetë përmbajtja e kakaos, aq më të mëdha janë përfitimet shëndetësore.
Një tjetër përbërës i rëndësishëm është arginina, një aminoacid që ndihmon organizmin të prodhojë oksid nitrik. Ky i fundit përmirëson qarkullimin e gjakut, ndihmon në luftimin e inflamacionit dhe kontribuon në rregullimin e presionit të gjakut duke zgjeruar enët e gjakut.
Studimet sugjerojnë gjithashtu se flavonoidet e çokollatës së zezë mund të rrisin ndjeshmërinë ndaj insulinës, duke ndihmuar organizmin të kontrollojë më mirë nivelin e glukozës në gjak. Kjo është veçanërisht e rëndësishme për personat me diabet të tipit 2 ose ata që janë në rrezik për ta zhvilluar atë.
Sipas hulumtimeve, personat që konsumojnë sasi të moderuara të çokollatës së zezë të paktën një herë në javë kanë rrezik më të ulët për diabet të tipit 2. Ndërkohë, diabetikët që zgjedhin çokollatën e zezë në vend të asaj të bardhë priren të kenë presion më të ulët të gjakut dhe kontroll më të mirë të sheqerit në gjak.
Përmbajtja e fibrave, proteinave dhe yndyrave në çokollatë ndihmon gjithashtu në rritjen e ndjenjës së ngopjes, duke reduktuar dëshirën për konsum të tepërt ushqimi.
Megjithatë, specialistët paralajmërojnë se përfitimet e kakaos mund të zbehen kur produktet përmbajnë sasi të larta sheqeri. Për këtë arsye rekomandohet konsum i moderuar dhe zgjedhja e çokollatës së zezë me përmbajtje të lartë kakaoje. Edhe pse ajo ofron përfitime të rëndësishme, ekspertët kujtojnë se ekzistojnë edhe ushqime të tjera me vlera ushqyese dhe antioksiduese edhe më të larta, të cilat duhet të jenë pjesë e një diete të balancuar.
