Pa kaluar as 12 orë, nga momenti kur Holta Zacaj doli mbi Kushtetutën duke e zgjatur afatin e qëndrimit në detyrë si anëtare e gjykatës Kushtetuese deri në fund të 2025, gjykata e Lartë reagoi dhe shpalli vakancën.
Në këtë mënyrë, Gjykata e Lartë si organ i emërtesës, e bëri të qartë që mandati i Zacajt si anëtare e gjykatës Kushtetuese, përfundon me 10 mars 2025 dhe për këtë shkak 3 muaj përpara sikurse parashikohet nga Kushtetuta dhe ligji shpalli vakancën.
Do duhet të ishte vetë Holta Zacaj, e cila ditën e djeshme, pra datë 10 dhjetor të thërriste mbledhjen dhe gjyqtarët kushtetues, të deklaronin përfundimin e mandatit të saj dhe të njoftohej Gjykata e Lartë për vakancën e krijuar.
Sepse zonja Zacaj pasoi ne detyrë Vitore Tushën dhe emri i saj përfshihej në skemën e parashikuar në dispozitat kalimtare të Kushtetutës, dhe më pas në ligjin për organizimin dhe funksionimin e gjykatës kushtetuese, skemë e cila garantonte përtëritjen e gjykatës cdo 3 vjet me nga 3 anëtarë.
Por, kryetarja e gjykatës nuk veproi në këtë mënyrë, por deklaroi se mandati i saj përfundon në fund të 2025 dhe se do ti drejtohej Komisionit të Venecias për opinion, kur në fakt po ky komision kishte mbështetur formulën për përtëritjen e kushtetueses. Pra, zonja Zacaj pasoi Vitore Tushën në detyrë dhe për shkak që të garantohej skema e përtëritjes mandati i saj dhe dy anëtarëve të tjera u kufizua nga 9 vite, në 8 vjet. Për rrjedhojë mandati i saj përfundon në 10 mars 2025.
Dhe zonja Zacaj e dinte më së miri këtë fakt, thjesht vendosi të injoronte Kushtetutën, në një kohë që ajo dhe kolegët duhet të bëjnë interpretim të saj.
“Mbledhja e Posacme e gjyqtarëve të Gjykatës së Lartë më datë 16 janar 2023 zgjodhi znj.Holta Zacaj si anëtare të Gjykatës Kushtetuese në vendin vakant që ishte krijuar për shkak të përfundimit në datë 10 mars 2017 të mandatit të znj.Vitore Tusha, si gjyqtare në detyrë, vijonte të ushtronte mandatin deri në zëvendësimin e saj. Pra, bazuar në nenin 197 pika 3 të Kushtetutës, znj.Holta Zacaj, që zëvendësoi znj.Vitore Tusha do të qëndronte në detyrë deri në mars të 2025. Koha e përfundimit të mandatit të gjyqtarit zëvendësues në mars të 2025 është bërë publike, në njoftimet e kryera nga Gjykata e Lartë për hapjen e procedurës së aplikimit për zgjedhjen e anëtarit të gjykatës Kushtetuese. Bazuar në këto njoftime, të gjithë kandidatët që kanë aplikuar për këtë vend vacant janë informuar për kohëzgjatjen e mandatit”, thekson gjykata e Lartë. Teksa shpall vakancën, gjykata supreme i kujton zonjës Zacaj se ndryshe nga se ajo e ka ditur, se mandati i përfundon në 10 mars 2025. Por, duket se kur cështjet janë personale dhe i prekin direkt ata, edhe gjyqtarët kushtetues, mbyllin sytë dhe e lexojnë si duan Kushtetutën dhe ligjin.
Në kushtet kur Holta Zacaj se kreu detyrën qe e ngarkon Kushtetuta, kryetari i gjykatës së Lartë Sokol Sadushi vendosi të shpallë vakancën dhe ftoi të gjithë të interesuarit të paraqesin kandidaturat. Afati I pranimit të kërkesave të kandidatëve është 30 ditë nga data e publikimit të njoftimit dhe më pas gjykata e Lartë ja përcjell listën KED për të vlerësuar kushtet dhe kriteret e emërimit të tyre në gjykatën Kushtetuese.
Duket se “kryengritja” e zonjës Zacaj merr fund këtu, por problem mbetet gjetkë. Te kryetarja e Kuvendit Elisa Spiropali, e cila pas dorëheqjes së anëtares Elsa Toska, parlamenti shpalli vakancën për një mandat të pjesshëm deri në vitin 2028, në një kohë që mandati i saj hynte në grupin e 3 mandateve, që duhet të përfundojnë në vitin 2025. I takon tashmë politikës të reagojë menjëherë dhe të mos shkelë Kushtetutën, pasi në këtë mënyrë cënohen balancat në Gjykatën Kushtetuese.
